Дек 13 Вервелаг Хала

Хьана кьван, хьанач кьван са Вервелаг хала. Гатфар хьайила, ада вичиз са кьакьан таран кукIва муг авуна. Ина ада какаяр хана, пуд шараг ахъайна. Шарагар хъуьтуьл туьк алай, хъипи кIуфар авай бицЫбур тир. Вервелаг халадиз абур гзаф кIандай. Абур ада кьуд патахъай шарар, цицIер ва маса недай затIар гъиз, хуьз хьана.
Къарикай са къуз са аждагьандиз и Вервелаг халадин муг авай чка акуна. Ада атана Вервелаг халадиз лагьана:
- Вервелаг хала, верг хала! Тумунив яна, тар кIаняй акъудда, сухавди яна, пут алудда. Вегь кван бубадиз са шараг.
Вервелаг халадиз кичIе хьана, ада шехьиз-шехьиз вичин шарагриз лагьана: Тьим вегьин, гьим тан, балаяр дидедин!" Чара хьанач, са шараг вегьена. Аждагьандини ам туькьуьнна.
Пака юкъуз аждагьан мад атана:
- Вервелаг хала, верг хала! Тумунив яна, тар кIаняй акъудда, сухавди яна пут алудда. Вегь кван, бубадиз са шараг, - лагьана.
Вервелаг халадиз чара хьанач, ада шехьиз-шехьиз мад са шараг вегьена. Имни аждагьанди туькьуьнна. Аждагьан хъфейла, Вервелаг хала таран хилел ацукьна, шехьиз акурла, са сикI атана, хабар кьуна:
"Я Вервелаг хала, верг хала, вун вуч из шехьзава?"
- Зун шехь тавуна, вуж шехьрай, - лагьана Вервелаг халади.
- Гьар къуз аждагьанди, къвез, заз лугьузва: "Вервелаг хала, верг хала, тумунив яна, тар кIаняй акъудда, сухавди яна, пут алудда. Вегь бубадиз са шараг". Зани кичIевиляй гьар юкъуз са шараг гузва. Пуд шарагдикай гила амайди сад я.
- Пака аждагьанди атана ваз гьакI лагьайла, - меслят гана сикIре, - вуна адаз лагь: "Свах ви къурунинди хьуй, тум ви чакъулдинди! Квахь, гьаясуз!" Эгер ада вавай "и гафар ваз ни чирна?" лагьана жузуртIа, вуна адаз лагь: "АтIа дингерал алай Кьукь халуди".
- Гзаф хъсан я, гьа вуна лагьайвал ийида за, - лагьана Вервелаг халади.
Пака юкъуз мад атана, аждагьанди лагьана:
- Вервелаг хала, верг хала! Тумунив яна, тар кIаняй акъудда, сухав яна пут алудда. Вегь кван, бубадиз са шараг.
- Свах ви къурунинди хьуй, тум ви чакъулдинди. Квахь, гьаясуз!  лагьана Вервелаг халади.
- Ваз а гафар ни чирна? - хабар кьуна аждагьанди.
- АтIа дингерал алай Кьукь халуди, - лагьана Вервелаг халади. ИкI лагьайла, аждагьанди, чукурна фена, дингерал алай Кьукь халудин кIулаз хкадарна. Аждагьан кIула акьахнамазди, Кьукь лув гана, цавуз экъечIа. ЭкъечIна, экъечIа, ахпа аждагьандивай хабар кьуна: "Чил кьакьандани, цав?"
- Цав, - лагьана аждагьанди.
Кьукь мадни цавуз экъечIна, хабар кьуна: "Чил кьакьандани, цав?"
- Цав, - лагьана аждагьанди.
Кьукьра аждагьан мадни цавуз акъудна, акъудна, абур лап цавун аршдиз акъатна, ахпа Кьукьра мад жузуна: "Чил кьакьандани, цав?"
- Чил, - лагьана аждагьанди.
ИкI лагьанмазди, Кьукьра ам вичин кIулай вегьена. Аждагьан чилел аватна, хъиткьинна, пад-пад хьана, адан къеняй Вервелаг халадин кьве шарагни ахкъатна. Абур чIив-чIирив "чун хъфида чи дидедин кьилив" лугьуз, пур-р-р авуна, лув гана, дидедин патав муказ хъфена.

P.S.: Уважайте труд людей, которые старались над сказкой и оставьте свои комментарии!

Comments: